Presidenti i Serbisë, Aleksandar Vuçiq, është pyetur për vizitën e “pesëshes së madhe” që pritet t’i bëjë Serbisë në fund të muajit. Emisari i Bashkimit Evropian për dialogun Kosovë-Serbi, Miroslav Lajçak, si dhe emisarët e presidentëve të Shteteve të Bashkuara të Amerikës, Francës, Gjermanisë dhe Italisë, do ta vizitojnë Serbinë në fund të muajit tetor, ka raportuar mediumi serb “Novosti” të martën.
Vuçiq ka thënë se përballet vazhdimisht me presione dhe se do të shohë se me çfarë pako do të vijë “pesëshja”.
“Kjo është jeta, kjo është puna e juaj. Përballeni me presione të jashtme, me ata që do të donin ta shkatërronin Serbinë në mënyra të ndryshme. Nuk besoj se ky është rasti me ‘pesëshen’, besoj se ata duan që në një mënyrë tjetër t’i shtrojnë problemet për zgjidhjen e krizës në Kosovë. Do të shohim se çfarë pakoje është ajo dhe çka sjell”, ka thënë Vuçiq, raporton “B92”.
Vuçiq ndërkohë ka thënë se dikush nga Serbia i ka shkruar Përfaqësuesit të Lartë të BE-së për Politikë të Jashtme, Josep Borrell, dhe ka kërkuar sanksionimin e Serbisë.
“Dikush i dërgoi Borrellit letër nga ky vend. Jo të vendosen sanksione ndaj Kurtit, e as atyre që keqtrajtojnë njerëz. Ata kanë shkruar që të vendosen sanksione ndaj vendit të tyre. E kuptoni? Nëse Qeveria mund të rrëzohet ashtu, vetëm që ata të marrin diçka për vete, është kaq e papërgjegjshme dhe joserioze”, ka thënë Vuçiq. “Unë jam shumë i butë kur flas për këtë, ata meritojnë një përgjigje shumë më të ashpër. Ne duam të jemi të qetë e të denjë dhe të përpiqemi të dalim nga një situatë e vështirë për ne. Kjo është gjëja më e rëndësishme”.
Vuçiq ka thënë se do të marrë pjesë më 23 tetor në New York në Seancën e Këshillit të Sigurimit të OKB-së.
