Në kuadër të normalizimit të marrëdhënieve Kosovë-Serbi, presidenti i Serbisë, Aleksandar Vuçiq thotë t’i jetë bërë një propozim nga Franca e Gjermania. Në adresimin e radhës për serbët, Vuçiqi tha se i është kërkuar të pajtohet që Kosova të bëhet anëtare e të gjitha organizatave ndërkombëtare, në këmbim të anëtarësimit të shpejtë të Serbisë në BE
Presidenti i Serbisë, Aleksandar Vuçiq, ka thënë të shtunën se Franca dhe Gjermania ia kanë vënë një propozim në tavolinë lidhur me Kosovën, i cili fare nuk i ka pëlqyer.
Në një adresim për serbët, ai deklaroi se dy fuqitë evropiane i kanë kërkuar që në këmbim të anëtarësimit të shpejtë të Serbisë në BE, Kosovës t’i lejohet anëtarësimi në organizata ndërkombëtare, përfshirë edhe në Kombet e Bashkuara.
“Pozicioni ynë sa i përket Kosovës po bëhet gjithnjë e më i komplikuar sepse sot kemi në tavolinë një propozim nga Franca dhe Gjermania, të cilin na është dashur ta diskutojmë sepse nuk mund ta hedhësh nga dritarja propozimin e dy fuqive më të mëdha evropiane”, ka thënë Vuçiq.
Këtë propozim Vuçiqi tha se e ka diskutuar me kryeministren serbe, Ana Bërnabiq, porse pavarësisht kësaj, nuk ka vullnet për një gjë të tillë, as nëse me mospranimin e tyre sakrifikohet e ardhmja e Serbisë në BE.
“Në këto momente në konsultim me kryeministren kemi konstatuar se nuk ka vullnet për të pranuar pavarësinë e Kosovës dhe anëtarësimin e saj në OKB”, ka deklaruar presidenti i Serbisë.
Kjo qasje e Serbisë, sipas korrespodentit të KOHËs në Bruksel, Augustin Palokaj, nuk është e re dhe se Kosova duhet ta vazhdojë e pavarur angazhimin e saj për anëtarësim në organizata ndërkombëtare.
“Nëse pritet që Serbia të pajtohet që Kosova të anëtarësohet shembull në Këshillin e Evropës apo në Interpol, atëherë kjo nuk do të ndodhë. Por, Kosova duhet ta ndjekë rrugën e vet. Është naive të besohet se Serbia do të pajtohej me anëtarësimin e Kosovës në çfarëdo organizatash ndërkombëtare. Pritet që të ketë presion ndaj Serbisë për disa marrëveshje ndërsa presion edhe ndaj Kosovës sidomos për krijimin e Asociacionit të komunave me shumicë serbe”, ka thënë Palokaj.
Në adresimin e tij, Vuçiqi po ashtu është shprehur i indinjuar se temat në kuadër të dialogut për normalizim të marrëdhënieve po i diktojnë shqiptarët e Kosovës.
