Një krim i rëndë ka ndodhur mëngjesin e sotëm në Prizren, ku babai ka therë për vdekje vajzën e tij 15-vjeçare, ndërkaq vajza tjetër ka mbetur e plagosur së bashku me nënën e saj.
E lidhur me këtë ka reaguar presidentja Vjosa Osmani. Osmani ka thënë se shtëpia nuk duhet kurrë të kthehet në skenë krimi.
Ndërsa ka pohuar se kjo nuk është vetëm tragjedi familjare, por dramë shoqërore, një alarm që kumbon fort për të gjithë.
Ndërsa i ka bërë thirrje organeve të drejtësisë, që të veprojnë me forcën maksimale të ligjit, pa asnjë mëshirë ndaj dhunës, zbardhje të plotë të rastit dhe ndëshkim maksimal.
“Ky nuk është thjesht një krim. Është një akt barbar. I bëj thirrje organeve të drejtësisë: veproni me forcën maksimale të ligjit, pa asnjë mëshirë ndaj dhunës! Zbardhje e plotë, ndëshkim maksimal – ky është minimumi që kërkon drejtësia në këtë rast”, ka thënë Osmani.
Reagimi i plotë i presidentes Osmani:
Shtëpia nuk duhet kurrë të kthehet në skenë krimi!
Kur brenda katër mureve të shtëpisë – aty ku duhet të ketë dashuri, siguri dhe ngrohtësi – ndodh një krim kaq i rëndë sikur ky që ndodhi sot, ku njëra vajzë vritet nga dora e babait dhe vajza tjetër mbetet e plagosur së bashku me nënën e saj, nuk jemi më vetëm përballë një tragjedie familjare. Jemi përballë një drame shoqërore, një alarm që kumbon fort për të gjithë. Për secilën shoqëri e secilin shtet!
Ky nuk është thjesht një krim. Është një akt barbar.
I bëj thirrje organeve të drejtësisë: veproni me forcën maksimale të ligjit, pa asnjë mëshirë ndaj dhunës! Zbardhje e plotë, ndëshkim maksimal – ky është minimumi që kërkon drejtësia në këtë rast.
Por drejtësia pas tragjedisë nuk mjafton. Kërkohet parandalim! Parandalim për të ndalur dorën që godet, për të shpëtuar jetët që sot janë të pambrojtura.
Nuk mundemi kurrsesi të kthejmë kokën anash! Nuk ka më “është punë familjare” kur dhuna gërryen nga brenda zemrën e një shoqërie.
Shtëpia nuk guxon të bëhet vend i frikës. Duhet të mbetet strehë e shenjtë!
Ngushëllime të thella për jetën e pafajshme të humbur. Lutje për forcë dhe shërim për të mbijetuarat. Dhe zë i lartë për drejtësi
