Qeveria e Kosovës ka miratuar në mbledhjen e së mërkurës Projektligjin për Institutin e Krimeve të kryera gjatë Luftës në Kosovë.
Ashtu siç ka raportuar KosovaNews, Instituti për Krimet e Luftës është votuar nga i gjithë kabineti qeveritar.
Në këtë rast, kryeministri Albin Kurti ka thënë se vetëm me respektimin e së kaluarës mund të ketë një të ardhme të ndritur.
“Instituti i krimeve të kryera gjatë luftës do të themelohet në kuadër të Zyrës së Kryeministrit. Vetëm me respektimin e duhur të së kaluarës mund të kemi një të ardhme të ndritur”, ka thënë Kurti.
Ndërkaq, ministrja e Drejtësisë, Albulena Haxhiu, ka thënë se projektligji përcakton kompetencat dhe përgjegjësit e Institutit.
Duhet theksuar se synimet ishin që në Qeverinë Kurti I të bëhej ky institut, por ndërrimi i dy qeverive bëri që të ngecë procesi i rithemelimit të Institutit për Krime Lufte.
Ekzekutivi aktual me të marrë mandatin shprehu gatishmërinë dhe synimin që pas miratimit të programit qeverisës, ta themelojë grupin e ri punues për këtë institut.
Grupi në fjalë është përbërë nga zyrtarë të Ministrisë dhe anëtarë të shoqërisë civile, përfshirë këtu organizata të profilizuara në çështjen e dokumentimit të krimeve të luftës.
Dhe tashmë pas mbarimit të gjithë procedurave Qeveria e Kosovës sot e votoi themelimin e Institutit për Krimet e Luftës.
Kujtojmë se Instituti për hulumtimin e krimeve të luftës ishte hapur në vitin 2011, ndërsa u mbyll në vitin 2018 me vendim të Ministrisë së Drejtësisë së atëhershme.
E pas kaq vitesh Qeveria e tashme nën udhëheqjen e Albin Kurti ka vendosur që ta themeloj këtë institut, që do t’i dokumentojë krimet e luftës që ka bërë Serbia në Kosovë./KosovaNews/
