Gratë për VETËVENDOSJE! dhe Rinia për VETËVENDOSJE, janë dy organizatat e reja të cilat i janë shtuar Lëvizjes Vetëvendosje. E kreu i kësaj partie, Albin Kurti tha se ato do ta rrisin politikën barazimtare dhe do ta shtojnë vendosmërinë për Lëvizje të gjerë e gjithëpërfshirëse.
Këto dy organizata në mbledhjet e para të tyre të Këshillit të Përgjithshëm, këtë të shtunë zgjodhën organet vendimmarrëse.
“Dy organizata që do ta rrisin politikën barazimtare dhe do ta shtojnë vendosmërinë për Lëvizje të gjerë e gjithëpërfshirëse. Gratë e rinia janë shumica jonë. Na duhet pjesëmarrje aktive e të dyja këtyre. U uroj secilës e secilit punë të mbarë drejt synimit për më shumë drejtësi e demokraci shoqërore”, ka shkruar Kurti në Facebook.
Sipas tij, dy organizatat që i janë shtuar Vetëvendosjes, e bëjnë atë infrastrukturë të sigurt për ndryshimet progresiste në Republikën e Kosovës.
