Ministri i Bujqësisë, Pylltarisë dhe Zhvillimit Rural, Faton Peci ka thënë të dielën se dëmet e shkaktuara në bujqësi nga reshjet e shiut dhe vërshimet do të kompensohen nga ministria, raporton KosovaNews.
Ai bëri këto deklarata pas një vizite që ka zhvilluar në Komunën e Gjakovës, për t’i parë më nga afër dëmet e shkaktuara në bujqësi nga reshjet që mbizotëruan këtë fundjavë në gjithë territorin e Kosovës.
“Në kuadër të kësaj vizite, takova edhe Kryetarin Ardian Gjini, i cili më njoftoi me të gjitha zonat e prekura nga përmbytjet e shkaktuara nga reshjet e shiut si dhe me ecurinë e procesit të vlerësimit të dëmeve”, ka shkruar ministri në rrjetin social.
Ai dha zotimet se dëmet e shkaktuara në bujqësi nga reshjet e shiut dhe vërshimet do të kompensohen nga ministria.
“Si Ministri, edhe këtë vit do realizojmë kompensimin e dëmeve në bujqësi. Këto dëme do të kompensohen pas vlerësimit të raporteve që do t’i sjellin drejtoritë komunale për bujqësi. Ne kemi të themeluar Komisionin për Dëme në Bujqësi i cili do të bëjë analizimin dhe vlerësimin e raporteve që vijnë nga Drejtoritë përkatëse. Muaji nëntor do të jetë muaji ku edhe do të fillojnë ekzekutimi i pagesave për dëmet në bujqësi për vitin 2022”, ka shkruar mes tjerash ministri Peci./KosovaNews/
