Zyra e Bashkimit Evropian sot është deklaruar lidhur me çështjen e shpronësimit në Leposaviq, saktësisht në zonat kadastrale, Dren dhe Leshak.
Kjo ka të bëjë me tokën që ishte caktuar për shpronësim nga Qeveria e Kosovës me një vendim që ishte marr më 16 janar të vitit 2023.
Zëdhënësi i Zyrës së Bashkimit Evropian për Kosovë, Nikola Gaon në një deklaratë për media tha se është e rëndësishme të theksohet se procesi i shpronësimit, sipas ligjit të Kosovës, kërkon një periudhë për konsultim publik dhe mundësinë për qytetarët e prekur që të kundërshtojnë çdo vendim për shpronësim në gjykata përpara se çdo vendim për shpronësim të bëhet i formës së prerë.
“Bashkimi Evropian i kërkon Qeverisë së Kosovës që të bëjë të gjitha përpjekjet për të siguruar që të ndiqet procesi i duhur dhe se të drejtat e pronarëve të tokave të respektohen plotësisht”, tha Gaon.
Ndryshe, Lista Serbe i ka dërguar një letër ambasadorëve të QUINT-it, me pretendimin se pronarëve serbë të tokave po iu “sekuestrohen”.
Qeveria e Republikës së Kosovës, në mbledhjen e mbajtur më 16 janar të këtij viti ka miratuar vendimin për shpalljen me interes të veçantë publik të pronave të paluajtshme, të cilat janë të nevojshme për realizimin e “Projekteve Infrastrukturore për Interes Publik”, zonat Kadastrale: Dren dhe Leshak, komuna Leposaviq.
