Estonia, Letonia dhe Lituania do të shkëputen nga rrjeti elektrik i administruar nga Rusia, në shkurt të vitit të ardhshëm.
Kompanitë e rrjetit të Estonisë, Letonisë dhe Lituanisë, kanë nënshkruar një marrëveshje, sipas së cilës vendet do të shkëputen, në shkurt të vitit 2025, nga rrjeti elektrik që kanë qenë bashkë me Rusinë dhe Bjellorusinë deri më tani, raporton agjencia e lajmeve Reuters.
Këtë e bëri të ditur edhe ministri i Energjisë së Lituanisë, Dainius Kreivys, të martën, në llogarinë e tij në Facebook.
“Ne e kemi ditur gjithmonë se ashtu siç jemi bërë pjesë e Bashkimit Evropian dhe NATO-s, do të bëhemi gjithashtu pjesë e sistemit evropian të energjisë elektrike”, shkroi Kreivys në përditësimin e tij.
Në gusht 2023, kryeministrat e tri vendeve nënshkruan një deklaratë të përbashkët duke njoftuar synimin e tyre për t’u tërhequr nga rrjeti elektrik ‘Brell’, i menaxhuar nga Rusia dhe për t’u bashkuar me sistemin e Evropës Perëndimore, më së voni deri në shkurt 2025.
Në deklaratë, të qenit pjesë e rrjetit të menaxhuar nga Rusia konsiderohej një kërcënim për sigurinë energjetike të vendeve baltike.
Vendimi për t’u bashkuar me sistemin evropian kontinental u mor në vitin 2018, kur projekti mori financimin e BE-së. Vendet janë të lidhura me rrjetin elektrik përmes Polonisë.
Bashkimi Sovjetik pushtoi vendet baltike që nga koha e Luftës së Dytë Botërore deri në vitin 1991 dhe vendet trashëguan sistemin elektrik që nga ajo kohë.
