Konflikti mes Izraelit dhe Iranit ka arritur kulmin pas tri ditë sulmesh ajrore dhe raketash që kanë shkaktuar viktima të shumta civile. SHBA, Rusia dhe vendet evropiane po përpiqen të ndërmjetësojnë në një krizë që rrezikon sigurinë globale.
Konflikti midis Izraelit dhe Iranit ka hyrë në ditën e tretë të përshkallëzimit intensiv, duke rrezikuar jo vetëm stabilitetin rajonal, por edhe rendin ndërkombëtar. Pas një sulmi ajror nga Izraeli ndaj objektivave iraniane, duke përfshirë ndërtesa të rëndësishme ushtarake, zona të populluara dhe objekte që dyshohet të jenë të lidhura me programin bërthamor të Iranit.
Teherani ka reaguar me sulme të drejtpërdrejta duke përdorur dronë dhe raketa balistike. Deri tani, raportimet konfirmojnë se 128 persona janë vrarë në Iran, ndërsa 10 qytetarë izraelitë kanë humbur jetën nga kundërsulmet iraniane.
Kryeministri izraelit Benjamin Netanyahu ka paralajmëruar një “çmim shumë të lartë” për sulmet iraniane që kanë shkaktuar vdekje të civilëve, ndërkohë që Irani insiston se Izraeli ka shkelur sovranitetin e tij dhe ka ndërmarrë agresione pa bazë.
Në arenën ndërkombëtare, reagimet janë të ndryshme. Presidenti i SHBA-ve, Donald Trump, u ka bërë thirrje palëve të ?bëjnë një marrëveshje?, duke konfirmuar se janë në zhvillim thirrje dhe takime mes aktorëve kryesorë.
Ai gjithashtu ka përmendur se presidenti rus Vladimir Putin është ofruar të ndërmjetësojë konfliktin dhe se kanë diskutuar gjatë rreth kësaj mundësie. Trump ka lënë të hapur mundësinë e përfshirjes së SHBA-së nëse situata përshkallëzohet më tej.
Nga ana tjetër, kancelari gjerman Friedrich Merz ka theksuar se ambiciet bërthamore të Iranit janë ‘një kërcënim ekzistencial” për Izraelin dhe komunitetin ndërkombëtar. Ai ka konfirmuar gjithashtu se Gjermania do të dërgojë pajisje për shuarjen e zjarrit në Izrael dhe ka paralajmëruar për përgatitje ndaj mundësisë së sulmeve të mundshme iraniane brenda territorit gjerman.
Shtetet e tjera kanë shprehur shqetësimet e tyre. Franca, Turqia, Iraku dhe Mbretëria e Bashkuar kanë bërë thirrje për zgjidhje diplomatike. Iraku është shprehur se përdorimi i hapësirës së tij ajrore nga Izraeli për të sulmuar Iranin përbën rrezik serioz për sigurinë rajonale.
