Një fëmijë i moshës 4 vjeç dyshohet se ka rënë mbrëmë në kanalin e Ibër-Lepencit në fshatin Akrashticë e Vushtrrisë.
Edhe pas kërkimeve deri në orët e vona ai nuk është gjetur.
Zëdhënësi i Policisë së Kosovës, për rajonin e Mitrovicës, Avni Zahiti, tha se mbrëmë vonë është ndalë kërkimi, kurse sot pritet të fillojë përsëri.
“Nuk ka ndonjë risi. Kërkimet rifillojnë sot përsëri”, deklaroi ai.
Rrethanat se si ka ardhur deri te rënia e fëmijës në kanalin e Ibër-Lepencit ende nuk dihen.
Në kërkim të djalit, mbrëmë që nga ora 18:30 kanë dalë ekipet emergjente, zjarrfikësit dhe ekipet e zhytësve për kërkim-shpëtim.
