Ministrja e Arsimit, e Shkencës, e Teknologjisë dhe e Inovacionit, Arbërije Nagavci, ka pritur në takim një delegacion nga Universiteti i Zarës, të prirë nga rektorja Prof. Dr. Dijana Vican me prorektoren dhe bashkëpunëtorët, të shoqëruar edhe nga udhëheqësja e projektit ALLED2, Efka Heder.
Në këtë takim është biseduar për bashkëpunimin e ndërsjellë në arsim, me theks të veçantë, ndihmën që mund të japë ky universitet dhe projekti ALLED2 në përmirësimin e cilësisë në Arsim dhe Aftësimin Profesional në Kosovë.
Ministrja Nagavci ka falënderuar rektoren Vican dhe ekipën e saj për gatishmërinë për ta mbështetur këtë segment të rëndësishëm të arsimit, zhvillimi i të cilit është edhe një nga prioritetet e MAShTI. “Po punohet në reformimin e këtij segmenti të arsimit dhe është vendosur edhe si një nga fushat prioritare në Planin Strategjik të Arsimit për pesë vitet e ardhshme”, ka theksuar ministrja.
Ndërsa, rektorja Dijana Vican ka shprhur gatishmërinë që ekspertizën dhe përvojën e Universitetit të Zarës, i cili është edhe më i vjetri në Kroaci, ta vërë në dispozicion të mbështetjes për arsimin në Kosovë.
Në takim është biseduar për mundësitë e mbështetjes për Kosovën në kualifikimin e mësimdhënësve të Arsimit dhe Aftësimit Profesional, validimit të kualifikimeve, si dhe për programe të reja dhe rishikim të programeve ekzistuese.
