Udhëheqësit anembanë Evropës kanë shprehur shqetësimet e tyre pas plagosjes së kryeministrit sllovak Robert Fico.
“Lajm tronditës nga Sllovakia. Robert, mendimet e mia janë me ty në këtë moment shumë të vështirë”, shkroi kryeministri polak Donald Tusk në X.
“Jam thellësisht i tronditur nga sulmi i tmerrshëm kundër mikut tim, kryeministrit Robert Fico. Ne lutemi për shëndetin dhe shërimin e tij të shpejtë! Zoti e bekoftë atë dhe vendin e tij!”, shkroi kryeministri hungarez Viktor Orbán.
“Lajmi për plagosjen e kryeministrit sllovak Robert Fico është tronditës. Uroj që kryeministri të shërohet sa më shpejt. Nuk duhet të tolerojmë dhunën, ajo nuk duhet të ketë vend në shoqëri”, tha kryeministri çek Petr Fiala.
“Kryeministri i Sllovakisë Robert Fico u qëllua disa herë pas një mbledhjeje të qeverisë dhe është në një gjendje të rrezikshme për jetën”, sipas një deklarate të postuar në faqen e tij zyrtare në Facebook.
“Udhëheqësi sllovak u transportua në spitalin në Banska Bystrica”, sipas deklaratës.
Qyteti Handlova, ku ndodhi sulmi, është rreth dy orë me makinë nga kryeqyteti, Bratislavë. Qeveria ishte në qytet për një takim jashtë vendit.
“Disa të shtëna u qëlluan në drejtim të Ficos”, sipas agjencisë së lajmeve TASR.
Shërbimi mjekësor i urgjencës i Sllovakisë tha se kishte dërguar një ambulancë me helikopter në vendngjarje.
Fico fitoi një mandat të tretë si kryeministër sllovak tetorin e kaluar, pasi drejtoi një fushatë që kritikonte mbështetjen perëndimore për Ukrainën.
Përpara zgjedhjeve, Fico nuk e fshehu simpatinë e tij ndaj Kremlinit duke fajësuar “nazistët dhe fashistët ukrainas” për provokimin e Vladimir Putinit për të nisur pushtimin, duke përsëritur narrativën e rreme që presidenti i Rusisë ka përdorur për të justifikuar pushtimin e tij.
Ndërsa ishte në opozitë, Fico u bë një aleat i ngushtë i kryeministrit të Hungarisë Viktor Orban, veçanërisht kur bëhej fjalë për kritikat ndaj Bashkimit Evropian.
