Mbi 1 milion turistë të huaj kanë vizituar Shqipërinë gjatë tre muajve të parë të vitit.
Numrin e lartë të tyre e dëshmojnë rrugët e mbushura me shtetas të huaj në kryeqytet dhe bregdet.
“Vijmë nga Shtetet e Bashkuara. Tirana është mahnitëse”, është shprehur një turist amerikan.
“Nuk dinim më parë për Tiranën. Vendosëm të bëjmë një udhëtim në Ballkan dhe thamë pse jo. Do të shohim dhe Shkodrën e Thethin”, ka deklaruar një turiste spanjolle. “Transporti këtu është më i thjeshtë se në Spanjë. Këtu hipën në autobus dhe paguan kur dikush të kërkon pagesën”.
“Na pëlqejnë njerëzit këtu, ushqimi, natyra… çmimet janë shumë të lira krahasuar ne Evropën dhe Meksikën”, ka thënë turistja meksikane.
Vizitorët e huaj shprehin përshtypjet për mikpritjen dhe panoramën e bukur që kanë gjetur në Shqipëri.
Por, turistë nga Evropa dhe Amerika Latine kanë shprehur rezerva për sektorin e shërbimit që po përballet me fluks në një kohë që vetë janë mungesë stafi.
Shqipëria u ofron pushime me kosto të ulët, por jashtë kamerave turistët kanë thënë se do të donin shërbim më të shpejtë në hotelet ku qëndrojnë dhe restorantet që frekuentojnë.
Problematikën e kanë konfirmuar operatorët turistikë, të cilët kanë bosh 100 mijë vende pune. Ende pa ardhur maji, 80% e vendeve akomoduese janë rezervuar dhe operatorët kanë marrë punëtorë nga Azia për të cilët paguajnë më shumë, por marrin shërbim më të mirë. Ndërsa fluksi më i madh i turistëve ende nuk ka mbërritur, operatorët turistikë janë në garë me kohën për të gjetur punëtorët./tch
