Presidenti amerikan Donald Trump të mërkurën refuzoi t’u përgjigjej pyetjeve të gazetarëve nëse SHBA-të po planifikonin të godisnin Iranin ose objektet e tij bërthamore.
“Ka një ndryshim të madh midis tani dhe një jave më parë”, u tha Trump gazetarëve jashtë Shtëpisë së Bardhë. “Askush nuk e di se çfarë do të bëj”.
Ndërsa siç raporton Sky News, lidhur me këtë ai tha: “…Mund ta bëj. Mund të mos e bëj”.
Sipas The Guardian, përcjell Telegrafi, Trump tha se Irani kishte propozuar të vinte për bisedime në Shtëpinë e Bardhë.
Megjithatë, ai nuk dha detaje.
Ai e përshkroi Iranin si plotësisht të pambrojtur, pa asnjë lloj mbrojtjeje ajrore.
“… Ata kishin qëllime të këqija, e dini, për 40 vjet kanë thënë vdekje Amerikës, vdekje Izraelit, vdekje kujtdo tjetër që nuk e pëlqenin”, shton ai, shkruan Sky News.
Ai gjithashtu thotë se “asgjë nuk ka mbaruar derisa të mbarojë”, dhe se lufta është “shumë komplekse”.
“Nuk do të thoja se kemi fituar ende diçka”, citohet të ketë thënë presidenti Trump.
“Do të thoja se me siguri kemi bërë shumë përparim. Dhe do ta shohim – java tjetër do të jetë shumë e madhe, ndoshta më pak se një javë, ndoshta më pak”
