Presidenti i Shteteve të Bashkuara të Amerikës, Donald Trump, u ka drejtuar investitorëve duke u thënë se politikat e tij nuk do të ndryshojnë kurrë, duke shtuar se “është një kohë e mrekullueshme për t’u bërë i pasur, më i pasur se kurrë më parë”.
Presidenti Trump e ka bërë këtë deklaratë përmes llogarisë së tij në rrjetin social Truth Social, duke iu drejtuar investitorëve që vijnë në SHBA dhe investojnë shuma të mëdha parash.
Trump u shpreh se: “Politikat e mia nuk do të ndryshojnë kurrë. Është një kohë e mrekullueshme për t’u bërë i pasur, më i pasur se kurrë më parë.”
Ai ka argumentuar se tarifat e shpallura prej tij do të rrisin investimet dhe prodhimin në vend. Në një deklaratë të djeshme, ai gjithashtu tha se kompanitë që dëshirojnë të shmangin tarifat do të investojnë “triliona dollarë” në vend duke prodhuar në SHBA.
Duke vënë në dukje se tashmë po ndërtohen shumë fabrika prodhimi në SHBA dhe se tani do të shihen shumë punë ndërtimi, Trump tha se tarifat “do ta bëjnë SHBA-në shumë të pasur”.
