Kanë mbetur më pak se 24 orë kur Kombëtarja e Kosovës do të luaj miqësoren ndaj Armenisë në Yerevan.
E në prag të këtij takimi, përzgjedhësi i Armenisë, Alexander Petrakov, ka folur fjalë të mëdha për Kosovën.
“Shumica luajnë në klube të ligave të forta. Muriqi luan në Mallorca. Portieri luan te Burnley në Premier League. Mbrojtësit janë të gjatë dhe e kanë të fortë lojën në ajër. Kosova është ekip i fortë dhe i pathyeshëm. Dëshirojmë që të arrijmë rezultat pozitiv”, ka deklaruar përzgjedhësi Petrakov.
Po ashtu, në konferencë për media ishte edhe futbollisti Vahan Bichakhchyan, i cili kërkoi fitore ndaj ‘’Dardanëve’’.
“Jemi përgatitur mirë për ndeshjet që na presim. Dëshirojmë t’i gëzojmë njerëzit tanë. Pas pushimit të gjatë do të luajmë sërish dhe është mundësi e mirë për ta filluar vitin me fitore. E kemi analizuar Kosovën dhe ka skuadër të mirë. Lojtarët luajnë në liga të forta. Kanë trajner të ri dhe është motiv shtesë për ta. Do të jetë ndeshje interesante”, ka thënë ai.
Përballja mes Armenisë e Kosovës do të nis nga ora 17:00.
