Lagja “Ralin” e qytetit të Prizrenit u asfaltua jo më larg se një ditë më parë (7 korrik), por pa kaluar as 24 orë asfalti i shtruar është thyer nga ekipet e KEDS-it, për shkak të punimeve që ky ekip nuk i kishte përfunduar ende.
E gjithë kjo, sipas asamblistit të Lëvizjes Vetëvendosje, Selman Sokoli, ka ndodhur për shkak se gjatë asfaltimit është harruar diçka.
“Kështu shtohen shpenzimet, s’ka kualitet, s’ka planifikim dhe në fund prap duhet me intervenu pas një kohe të shkurtër”, ka shkruar Sokoli.
Sipas tij, krejt kjo kujton Kosovën e para 14 shkurtit 2021, kur PDK, AAK dhe LDK ishin në pushtet.
Duke reaguar në lidhje me çështjen, edhe asambleja e Lëvizjes Vetëvendosje, Mimoza Bushrani, ka thënë se deri te thyerja e asfaltit ka ardhur si rezultat i ngutjes së kryetarit të Komunës, Shaqir Totaj, për përfundimin e punimeve në kohë më të shkurtë.
Ndërkaq, mbarëvajtjen e këtyre punimeve e kishte parë nga afër vetë kryetari i Komunës, Shaqir Totaj, gjatë ditës së djeshme (7 korrik), duke shkruar në Facebook se po punohet në mënyrë efikase që projekti të përfundojë sa më shpejtë.
Për të marrë një sqarim në lidhje me këtë, KosovaNews ka pyetur zëdhënësen e Komunës së Prizrenit, Jona Hoxhaj, por nuk ka arritur të marrë përgjigje deri në publikimin e këtij shkrimi.
