Amerikani njëzetenjëvjeçar, Michael Alexander Gloss, nënshkroi një kontratë me ministrinë ruse të Mbrojtjes dhe humbi jetën duke luftuar në luftën kundër Ukrainës në vitin 2024, raportoi portali rus i pavarur hulumtues IStories.
Ajo që e bën historinë edhe më të pabesueshme është fakti se nëna e tij, Julianne Gallina Gloss, është zëvendësdrejtore e CIA-s për inovacionet digjitale.
Sipas të dhënave të sistemit të menaxhimit të të dhënave mjekësore të Moskës (EMIAS), të cilat janë bërë publike, Gloss nënshkroi kontratën me ushtrinë ruse më 5 shtator 2023, shkruan theguardian.
Gloss ishte regjistruar në sistem nga punonjës të qendrës për rekrutimin e ushtarëve me kontratë në Moskë, dhe si adresë banimi – njësoj si për qindra vullnetarë të huaj të tjerë – ishte shënuar adresa e vetë qendrës. Po në këtë hapësirë zhvillohen edhe kontrollimet mjekësore për kandidatët për rekrutim.
Sipas një burimi të afërt me Gloss, shtetasi amerikan u dërgua në njësitë sulmuese në dhjetor të vitit 2023. Në atë kohë, regjimenti i 137-të operonte në veriperëndim të Soledarit në rajonin e Donetskut.
Gloss humbi jetën më 4 prill 2024, fakt që u konfirmua edhe nga njoftimi për vdekje i publikuar nga familja e tij. Detajet e sakta të rrethanave të vdekjes nuk dihen. Sipas të dhënave të kompanisë funerale, ai u varros në Shtetet e Bashkuara plot tetë muaj pas vdekjes.
Michael Gloss është një nga më shumë se 1500 shtetas të huaj që kaluan nëpër qendrën e rekrutimit në Moskë gjatë luftës në Ukrainë, identiteti i të cilëve është zbuluar nga IStories.
Sipas të dhënave të portalit, në anën ruse të luftës janë bashkuar mercenarë nga gjithsej 48 vende, përfshirë shtete anëtare të Bashkimit Evropian dhe Shtetet e Bashkuara të Amerikës.
