Policia e Kosovës ka zhvilluar një aksion në Lipjan, lidhur me një tentim vrasje që kishte ndodhur më 2 qershor të këtij viti.
Gjatë aksionit është arrestuar i dyshuari për tentim vrasje dhe armëmbajtje pa leje.
Pas hetimeve të mëhershme, policia në bashkëpunim me prokurorin, ka bastisur shtëpinë dhe pronën e një biznesi privat.
Gjatë bastisjes janë sekuestruar 145 fishekë të kalibrave të ndryshëm, një pistoletë, një DVR, një telefon mobil dhe një shumë prej 2,710 eurosh.
“Lipjan 02.06.2024 – 23:45. Lidhur me rastin më datë 16.10.2024, njësit policore në koordinim me prokurorin kanë bërë bastisjen në shtëpinë dhe objekteve përcjellëse si dhe në një pronë të një biznesi privat, pronë e të dyshuarit mashkull kosovar. Aty janë gjetur dhe sekuestruar; 145 fishekë të cal. të ndryshëm, një armë zjarri pistoletë, një DVR, një telefon mobil, si dhe një shumë e parave në vlerë rreth 2.710 euro”, thuhet në raportin e PK-së.
Pas intervistimit, me vendim të prokurorit, i dyshuari është dërguar në mbajtje, ndërkohë që hetimet po vazhdojnë.
