Të premten ka ndërruar jetë njëri nga viktimat e tentim vrasjes së trefishtë që ndodhi para disa javësh në komunën e Pejës.
Këtë e ka konfirmuar zëdhënësi i Prokurorisë Themelore në Pejë, Shkodran Nikçi.
“Po, është lëshuar një urdhër nga Prokurori i Shtetit që trupi të dërgohet në IML për Obduksion” , ka thënë ai.
Më 22 maj në Pejë, tre persona janë plagosur nga të shtënat me armë zjarri rreth orës 21:25 në rrugën “Bekim Berisha”.
Gjykata Themelore e Pejës ka aprovuar kërkesën e Prokurorisë Themelore të Pejës për caktimin e masës së paraburgimit ndaj Agron Gashit, i cili dyshohet për tentim vrasjen e trefishtë.
Sipas dosjes fillestare të Prokurorisë, personat e përfshirë në këtë rast, nuk kishin probleme paraprakisht, por se deri te zënka erdhën pasi ishin përfshirë si palë të treta në diskutimet që dy të njohur të tyre po i bënin për shitblerjen e një veture “Golf lll”.
Në dokumentin për kërkesën për paraburgim përshkruhet edhe arratisja e 21-vjeçarit, i cili del se është ndihmuar nga vajza e axhës së tij e cila po ashtu është arrestuar.
