Kryeministri i Shqipërisë, Edi Rama, ka përsëritur edhe njëherë se situata në veri të Kosovës duhet të shtensionohet sa më parë, pasi siç ka thënë ai, perspektiva e krijimit të një “Donbasi të vogël” në mes të Evropës është një rrezik real.
Në një konferencë të përbashkët për shtyp në Holandë me Sekretarin e Përgjithshëm të NATO-s, Jens Stoltenberg, kryeministrat e Holandës, Belgjikës dhe Norvegjisë si dhe me presidentët rumun, polak e lituanez, Rama tha se duhet të bëhet gjithçka për të sjellë dialogun Kosovë-Serbi në nivelin më të lartë.
Ai theksoi rëndësinë e KFOR-it, si një garanci për sigurinë për shkak të një përshkallëzimi të mëtutjeshëm, derisa u shpreh se dëshiron të shoh tek arrin sukses dialogu i BE-së.
Rama është ndalur tek deklarata për shmangien e një “Donbasi të dytë në Ballkan”.
Kreu i qeverisë shqiptare tha se kërcënimi është real ndaj duhet vepruar sa më shpejt për të “mos lejuar këtë spirale absurditeti që të hedhë poshtë atë që kemi ndërtuar deri tani me ndihmën e BE-së”.
“Perspektiva e krijimit të një Donbasit të vogël në mes të Evropës për shkak të një përshkallëzimi është një rrezik real dhe ne duhet të bëjmë gjithçka për të sjell dialogun në nivelin më të lartë, me mbështetjen e SHBA-së, dhe që të sigurohemi se KFOR-i do të jetë aty për të garantuar sigurinë për shkak të një përshkallëzimi të mëtutjeshëm. Të gjithë e kuptojnë që është koha për të vepruar dhe të mos lëmë asnjë mundësi që të hidhet poshtë ajo çfarë kemi ndërtuar”, tha Rama derisa shtoi se një përshkallëzim i mëtutjeshëm do të sillte pasoja katastrofike.
Kryeministri tha se dialogu duhet të vazhdojë ndërsa shtoi se “ne nuk duam të shohim një thyerje të Ballkanit Perëndimor”.
