Zëdhënësja zyrtare e Ministrisë së Punëve të Jashtme të Rusisë, Maria Zakharova ka komentuar deklaratat e Presidentit serb Aleksandër Vuçiç në një intervistë me një revistë gjermane në lidhje me gatishmërinë e Beogradit për t’i shitur municion Bashkimit Evropian.
Zakharova deklaroi se Moska ka marrë vazhdimisht siguri nga udhëheqja serbe se eksporti i municioneve është nën kontroll të rreptë dhe se armët e prodhuara në Serbi nuk do të dorëzohen në Ukrainë.
“Moska ka marrë vazhdimisht siguri nga udhëheqja e Serbisë se eksporti i municioneve të prodhuara në Serbi është nën mbikëqyrje të rreptë dhe se këto mallra nuk do të dorëzohen në Ukrainë, me qëllim që të parandalohet që Kievi t’i përdorë ato kundër ushtarëve tanë”, tha Zakharova në një konferencë për mediat.
Duke folur për deklaratat publike kontradiktore të presidentit serb, Zakharova shtoi se i duket sikur flasin disa Vuçiç të ndryshëm, për shkak të qëndrimeve të tij jokoherente për raportin me Moskën dhe Brukselin.
“E dini, kur lexoj të gjitha ato intervista të Presidentit të Serbisë, pyes veten nëse vërtet ekziston vetëm një President Vuçiç, sepse të jepet përshtypja se këto intervista jepen nga njerëz krejtësisht të ndryshëm. Dëgjojmë deklarata të caktuara kur ai është në Moskë dhe krejtësisht të ndryshme kur flet nga pika të tjera gjeografike. Unë po flas vetëm për atë që është në sferën publike. Ndoshta media ka raportuar gabimisht diçka, por në atë rast duhet të ketë një shpjegim nga zyra e shtypit e presidentit”, theksoi Zakharova.
Ajo kujtoi se pala ruse në nivelin më të lartë ka marrë vazhdimisht siguri nga Beogradi për respektimin e neutralitetit dhe kontrollin e eksporteve të armëve.
“Sinqerisht, disa herë, dhe në nivelin më të lartë, kemi marrë deklarata nga udhëheqja e Serbisë se eksporti i municioneve serbe kontrollohet rreptësisht dhe se këto mallra nuk do të përfundojnë në Ukrainë, në mënyrë që të parandalohet përdorimi i tyre kundër ushtarëve tanë”, theksoi zëdhënësja e MPJ-së ruse.
Ajo gjithashtu i kujtoi Beogradit se “ushtarët rusë i kanë ardhur vazhdimisht në ndihmë popullit vëlla, serb“.
“Refuzoj të marr në konsideratë jo vetëm mundësinë, por edhe vetë mendimin se ushtarët rusë, të cilët historikisht dhanë zemrat e tyre – në çdo kuptim të fjalës – duke dhënë jetën e tyre ose duke shprehur dashuri dhe besnikëri ndaj vëllezërve të tyre serbë, mund të goditen ose vriten nga armët, municionet dhe granatat serbe”, përfundoi Zakharova reagimin e saj.
Më parë, Shërbimi i Inteligjencës së Jashtme Ruse (SVR) njoftoi se Beogradi dyshohet se dërgoi municione në Kiev, pavarësisht qëndrimit të tij të shpallur neutral.
Pas kësaj, Vuçiç deklaroi se “të gjitha dërgesat e kontestuara do të anulohen nëse ka dyshime në lidhje me dokumentacionin ose përdoruesin përfundimtar“. Më 23 qershor, ai njoftoi se Serbia ka pezulluar eksportin e municioneve dhe se do të kërkohen vendime të posaçme për çdo dërgesë të ardhshme jashtë vendit.
