Kur zjarri në Palisades, Kaliforni filloi të përhapej me shpejtësi të martën në mbrëmje, drejtori i një agjencie të pasurive të patundshme në Los Angeles, Keith Wasserman, publikoi një thirrje urgjente në rrjetet sociale.
“A ka ndokush qasje te zjarrfikës privatë që mund të mbrojnë shtëpinë tonë në Pacific Palisades? Duhet të veprojmë shpejt. Të gjitha shtëpitë e fqinjëve janë duke u djegur. Do të paguaj çdo shumë”.
Ky mesazh, që më vonë u fshi, shkaktoi reagime të ashpra nga përdoruesit e rrjeteve sociale, të cilët e konsiderojnë të padrejtë që të pasurit të kenë trajtim të veçantë në situata të tilla.
Sipas raportimeve të mediave amerikane, disa banorë të Los Angelesit paguajnë mijëra dollarë për të lyer shtëpitë e tyre me xhel mbrojtës kundër zjarreve, ndërsa të tjerë investojnë në hidrantë privatë për të shuar zjarrin pranë pronave të tyre.
Pavarësisht reagimeve negative ndaj postimit të Wassermanit, shumica e zjarrfikësve privatë nuk punojnë për individë të pasur, tha për CNN zjarrfikësi, Mike Stutts nga Somerset, Kaliforni.
Në vend të kësaj, ata bashkëpunojnë kryesisht me kompanitë e sigurimeve që përpiqen të shpëtojnë shtëpi të kushtueshme për të shmangur pagesa të mëdha dëmshpërblimesh.
Tim Bauer, nënkryetar i shërbimit për menaxhimin e dëmeve nga zjarri në kompaninë Allied Disaster Defense, tha se pas tri ditëve të para të zjarrit në Pacific Palisades kishte një listë pritjeje me të paktën 200 persona që kërkonin urgjentisht shërbimet e kompanisë së tij.
Bauer shpjegoi se kompania e tij lyejnë pronat me të njëjtin material që përdoret nga avionët zjarrfikës për të ngadalësuar përhapjen e zjarreve.
