Taulant Xhaka dha një asistim të përkryer për Gjorgje Jovanoviqin, për epërsinë 1:0 të Baselit kundër Luzernit.
Për kapitenin e skuadrës së madhe zvicerane ishte asistimi i parë i sezonit.
Baseli dhe Luzerni të enjten mbrëma barazuan 1:1, në ndeshjen e xhiros së tetë të Superligës së Zvicrës.
Por Xhaka, i cili luajti deri në minutën e 80-të për vendësit, nuk është ndarë i kënaqur pas ndeshjes me mënyrën se si u pranua goli i barazimit.
Ardon Jashari e shënoi golin për 1:1 në minutën e 81-të, me asistim të Kemal Ademit. Jashari ishte afër transferimit te Baseli në afatin kalimtar veror.
“E kemi parë që Luzerni në momentet e fundit kishte më shumë vetëbesim. Por ne kemi provuar ta ruajmë rezultatin, luftuam shumë dhe pranuam një gol të lehtë në fund. Ne kemi nevojë për katër fitore rresht, dhe më pas gjërat do të duken ndryshe. Duam ta fitojmë çdo ndeshje dhe të japim çdo gjë për klubin. Një pikë kundër Luzernit nuk është mjaftueshëm. Ne luftojmë për më shumë, por duhet të shohim në ndeshjet e ardhshme”, ka theksuar Xhaka.
