Drejtori i Milanit, Igli Tare, u ka bërë thirrje tifozëve që të jenë “të bashkuar” me klubin pavarësisht protestave të planifikuara sonte, duke insistuar se “kualifikimi në Ligën e Kampionëve është themelor” si në aspektin sportiv, ashtu edhe ekonomik.
Presioni po rritet mbi kuqezinjtë pas vetëm shtatë pikëve në po aq ndeshje, duke vënë në dyshim edhe sigurimin e një vendi në Champions.
Gjithashtu janë planifikuar protesta këtë mbrëmje, me tifozët që po drejtojnë zemërimin e tyre ndaj CEO-s Giorgio Furlani, madje duke nisur edhe një peticion me mijëra firma që kërkon largimin e tij.
“Tifozët kanë të drejtë të shprehin mendimet e tyre, e rëndësishme është që të jemi të gjithë të bashkuar në këtë moment, sepse është thelbësore ta përfundojmë procesin që nisëm këtë sezon,” tha Tare për “DAZN Italia”.
“Duhet të përpiqemi të mos përsërisim gabimet që kemi bërë në të kaluarën, sepse një paraqitje si ajo ndaj Sassuolo Calcio lë një shije të hidhur. Ka qenë një javë e vështirë, por të gjithë jemi të bindur se skuadra do të japë një reagim të fortë sonte”, shtoi ai.
Është folur shumë për të ardhmen e Tares dhe të trajnerit Massimiliano Allegri, ndaj pyetja ishte se sa mund të ndikojë kualifikimi në Champions në statusin e tyre në “San Siro”.
“Kualifikimi në Champions është themelor jo për mua, por për këtë klub dhe tifozët. Kemi ngadalësuar javët e fundit, por fati ynë është ende në duart tona dhe duhet të japim një përgjigje sonte. Është thelbësore për këtë klub të sigurojë pjesëmarrjen në Champions, jo vetëm ekonomikisht, por edhe në aspektin sportiv”, u shpreh ai.
Rafael Leão fillimisht pritej ta nisë ndeshjen nga stoli, por Christian Pulisic pësoi një tërheqje muskulore në pjesën gluteale gjatë stërvitjes së mëngjesit, duke bërë që portugezi të ruajë vendin në formacion.
Santiago Giménez starton për herë të parë që nga 28 tetori, që rastësisht ishte gjithashtu kundër Atalantas, pasi u rikuperua nga një operacion në kyçin e këmbës.
Fikayo Tomori është i pezulluar, ndërsa Luka Modrić mungon për pjesën e mbetur të sezonit pas një frakture në fytyrë.
“Mungesa e Modrić është një goditje për skuadrën në fushë, por ai nuk është larguar, sepse çdo ditë qëndron në Milanello me ekipin duke u përpjekur t’i motivojë lojtarët. Jam shumë i bindur që Luka do ta vazhdojë eksperiencën e tij te Milani edhe sezonin e ardhshëm,” siguroi Tare.
