Drejtori i ri sportiv i Milanit, Igli Tare, ka filluar punën sot (e hënë), duke u takuar me drejtuesit e Romës për Alexis Saelemaekers, Tammy Abraham dhe Francesco Camarda.
Njoftimi se Tare ishte punësuar më në fund erdhi këtë mbrëmje , disa ditë pas raportimeve për një marrëveshje dhe një kontratë tre-vjeçare të nënshkruar.
Në të vërtetë, ai e kishte filluar punën e tij të re disa orë më parë, teksa hyri në selinë e Casa Milan më herët këtë pasdite.
Ai u pasua shpejt nga drejtori sportiv i Romës, Florent Ghisolfi, dhe agjenti Beppe Riso, i cili veproi si ndërmjetës verën e kaluar në shkëmbimin e huazimeve midis Saelemaekers dhe Abraham.
Të dyja ishin huazim i thjeshtë, që do të thotë se ata nuk kanë mundësi ta bëjnë të përhershme marrëveshjen, kështu që kushtet duhet të negociohen.
Kjo është ajo që po ndodhte sot, pasi Roma e ka bërë të qartë se dëshiron ta blejë Saelemaekers menjëherë , ndërsa Milani është më pak i sigurt për ta mbajtur Abrahamin.
Sipas MilanNews.it, një tjetër temë diskutimi ishte sulmuesi i ekipit të të rinjve të Milanit, Camarda, i cili po kërkon më shumë minuta lojë sezonin e ardhshëm.
Një marrëveshje huazimi me Romën është plotësisht e mundshme, veçanërisht tani që ekipi i Milan Futuro ka rënë nga Serie C.
Camarda mbushi vetëm 17 vjeç në mars dhe bëri 14 paraqitje për klubin këtë sezon, shumicën e tyre si zëvendësues, për vetëm 234 minuta futboll.
