Nënkryetari i Lidhjes Demokratike të Kosovës, Lutfi Haziri pas takimit me emisarin evropian për dialogun, Miroslav Lajçak tha se ka konfirmuar angazhimin e LDK-së në këtë proces dhe se nuk ka opsion tjetër përpos dialogut.
Haziri tha se situata pas 24 shtatorit ka ndryshuar, por fatkeqësisht Qeveria e Kosovës nuk ka arritur të kapitalizojë këtë ambient të mirë politik dhe rikthimin e imazhit të Kosovës.
“Ne u takuam për të disatën herë. Angazhimi i tij është për tu vlerësuar përkundër që po vazhdojmë të mbahemi në terr për shkak të mos zbardhjes së dokumentit, së paku në parime dhe në angazhim apo orientime që kryeministri duhet me u ofruar deputetëve dhe popullit të Kosovës”, tha ai, duke shtuar se dialogu nuk ka opsion dhe është e vetmja rrugë për të zgjedh problemet me Serbinë.
Lutfi Haziri ka folur edhe për “kërcënimet nga grupet terroriste” si dhe vendimin e Policisë së Kosovës, për mbrojtje të afërt policore ndaj kreut të LDK-së, Lumir Abdixhiku.
Haziri tha se Abdixhiku iu ka besuar vlerësimeve të organeve të shtetit, mirëpo siç tha ai, i pari i LDK-së nuk e ka ndërprerë agjendën e tij.
Haziri tha se pasiguria juridike është më problematike dhe siç u shpreh ai “për ne si LDK kjo është shqetësuese”.
“I ka besu vlerësimeve të organeve të shtetit, dhe po sillet karshi atij vlerësimi. Nuk ka ndërpre asgjë në agjendën edhe në rutinën e tij. Policia ka kapacitete profesionale me siguru, vetëm është rrit kujdesi i organeve të sigurisë. Pasiguri juridike ka në Kosovë dhe kjo është më problematike dhe na shqetëson si LDK më shumë”, ka thënë Haziri.
