Udhëheqësit e Francës dhe Gjermanisë, Emmanuel Macron dhe Olaf Scholz, mbajtën një takim në Paris të mërkurën për të diskutuar një sërë çështjesh dypalëshe. Megjithatë, pas takimit nuk pati konferencë të përbashkët për shtyp, të cilën shumë e interpretuan si shenjën e parë të mosmarrëveshjes mes aleatëve, shkruan Politico.
Ndonëse paraprakisht ishte paralajmëruar se Macroni dhe Scholzi do të mbanin konferencë të përbashkët për shtyp pas takimit, që është një aktivitet i zakonshëm pas takimeve të tilla, kjo nuk ndodhi.
“Scholz udhëtoi për në Paris me një numër gazetarësh dhe prej andej ai vazhdoi aktivitetet e tij diplomatike dhe shkoi në Athinë. T’i mohosh një konferencë për shtyp një mysafiri është një taktikë politike që përdoret përgjithësisht kur dikush dëshiron të qortohet. Kjo është ajo që vetë Scholz bëri së fundmi kur kryeministri hungarez Viktor Orban vizitoi Berlinin”, shkruan revista.
Gjithashtu, mungesa e konferencës së përbashkët për shtyp është vetëm një nga një sërë problemesh mes dy vendeve.
“Në javët e fundit, Macroni dhe Scholzi u përplasën për mënyrën se si të merren me krizën energjetike, si të kapërcejnë dobësinë e Evropës në mbrojtje dhe si të gjejnë qasjen më të mirë për zgjidhjen e problemit të Kinës. Tensionet dolën në publik kur takimi i planifikuar i Qeverisë së Francës dhe Gjermanisë u shty për janar për shkak të dallimeve të mëdha në lidhje me tekstin kur bëhet fjalë për deklaratën e përbashkët”, thuhet më tej në artikullin e Politicos.
Sipas analizës, ajo për të cilën ankohen zyrtarët francezë është se Berlini nuk i trajton ata si një partner të ngushtë.
“Për shembull, francezët pretendojnë se nuk janë informuar paraprakisht për paketën gjermane të lehtësimit për çmimet e energjisë me vlerë 200 miliardë euro. Parisi është i irrituar nga fakti që Gjermania po merret vetëm me uljen e çmimit të gazit dhe jo me mungesën e mbështetjes për projektet e përbashkëta evropiane të teknologjisë së mbrojtjes”, theksoi në analizë.
Tensionet mes Berlinit dhe Parisit kanë nisur që në gusht dhe shkak ka qenë një takim mes Scholzit dhe kryeministres së re të Francës, Elisabeth Borne.
