Kosova do të jetë sërish nikoqire e stërvitjes më të madhe ushtarake ndërkombëtare “Defender Europe 2025″. Ky ushtrimi fushor, është një ushtrim vjetor i shkallës së gjerë që drejtohet nga Ushtria e Shteteve të Bashkuara të Amerikës për Evropë dhe Afrikë.
Zëvendësministri i Mbrojtjes, Shemsi Syla, thotë se pjesëmarrja e Kosovës në “Defender Europe 2025″ është tejet e rëndësishme.
“Kosova do të jetë nikoqire dhe pjesë e këtij ushtrimi të madh, falë SHBA-së dhe shteteve aleate dhe kjo është shumë e rëndësishme, sepse tregon se jemi bashkëpunues, profesional, kualitativ dhe një aleat i besueshëm”, tha Syla për RTK.
Kurse sa i përket lajmit se Shtetet e Bashkuara të Amerikës njoftuan dje se kanë pranuar kërkesën e Kosovës për blerjen e raketave anti-tank “Javelin”, Syla tha se Kosova ka bërë të gjitha planet për plotësimin e kapaciteteve të nevojshme për siguri dhe se ky është një lajm i mirë, sepse SHBA e dërgoi në Kongres këtë çështje dhe tani pritet blerja e këtyre raketave.
