Ministri i Punëve të Brendëshme, Xhelal Sveçla ka takuar komandantin e KFOR-it, gjeneralmajor Özcan Ulutaş, me të cilin ka biseduar për situatën e përgjithshme të sigurisë, dhe veçanërisht për sigurinë në katër komunat veriore të Republikës së Kosovës, pas sulmit terrorist të 24 shtatorit në Banjskë të Zveçanit ku mbeti i vrarë rreshteri Afrim Bunjaku dhe dy zyrtarë të tjerë të plagosur.
“E falënderova komandantin Ulutaş për mbështetjen dhe bashkëpunimin e vazhdueshëm të KFOR, për ngritjen e kapaciteteve të tyre si dhe për shtimin e patrullimeve të përbashkëta përgjatë brezit kufitar me Serbinë”, ka shkruar ministri Sveçla në Facebook.
Ai ka shkruar se të dyja palët ndajnë qëllime të përbashkëta të garantimit të sigurisë, paqes dhe stabilitetit për qytetarët tanë në vendin tonë andaj do të punojnë bashkërisht në realizimin e këtij qëllimi.
