Pas bastisjeve të fundit në veri të Kosovës, kryeministri Albin Kurti ka njoftuar se janë konfiskuar armë, uniforma dhe pajisje të ndryshme, ndërsa janë gjetur edhe emblema ruse dhe serbe të strukturave të inteligjencës dhe forcave të sigurisë.
Kjo, sipas Kurtit, tregon për mundësinë e përfshirjes së grupeve ekstremiste dhe terroriste serbo-ruse, të cilat synojnë destabilizimin e Kosovës dhe krijimin e pasigurisë në rajon.
“Pas bastisjeve në veri të Kosovës, në lidhje me sulmin kinetik terrorist të datës 29 nëntor 2024 ndaj kanalit të Ibër Lepencit, janë konfiskuar armë, uniforma dhe pajisje të ndryshme, si dhe janë gjetur emblema ruse dhe serbe të strukturave të inteligjencës, ushtrisë dhe sigurisë. Ky zbulim shqetësues dëshmon për përfshirjen potenciale të grupeve ekstremiste dhe terroriste serbo-ruse, me lidhje të forta në Serbi, që kanë për qëllim destabilizimin e Kosovës dhe krijimin e një mjedisi të pasigurt në rajon”, ka shkruar Kurti ne Facebook, ku i ka publikuar me detaje edhe emblemat serbo-ruse të sekuestruara në veri.
Kryeministri ka theksuar se ky është një kërcënim i drejtpërdrejtë ndaj stabilitetit dhe paqes në Ballkan, duke kërkuar një reagim të unifikuar dhe vendimtar ndaj këtyre aktiviteteve destabilizuese.
Ai ka potencuar se këto aksione rrezikojnë sigurinë e përgjithshme dhe vlerat demokratike në rajon.
“Stabiliteti dhe paqja në Ballkan kërkojnë një reagim të unifikuar dhe vendimtar kundër këtyre aksioneve terroriste dhe aktiviteteve destabilizuese që rrezikojnë sigurinë e përgjithshme dhe vlerat demokratike në rajon”, ka shkruar tutje Kurti në Facebook.
