Ish-presidenti amerikan, Donald Trump është plagosur të shtunën në mbrëmje gjatë tubimit të tij në Butler, Pensilvani, derisa FBI-ja thotë se ishte një atentat. Sipas FBI-së, sulmuesi ishte 20-vjeçari, Thomas Matthew Crooks.
Një person i armatosur dhe të paktën një pjesëtar i audiencës kanë vdekur, ka bërë të ditur Shërbimi Sekret, dhe dy të pranishmit e tjerë janë plagosur rëndë, raporton CNN.
Trumpi ka thënë në rrjetet sociale se ai u qëllua dhe u godit nga një plumb në pjesën e sipërme të veshit të djathtë. Shërbimi Sekret ka thënë se ish-presidenti është i sigurt pasi u nxor nga skena me gjak në fytyrë.
Dëshmitarët okularë përshkruan një skenë “të përgjakshme” dhe kaotike.
FBI-ja ka thënë se sulmuesi qëlloi disa herë përpara se të vritej nga agjentët. Burime të zbatimit të ligjit kanë thënë për CNN se vrasësi ishte në një çati të një ndërtese jashtë vendit të tubimit.
Presidenti Joe Biden ka folur me Trumpin pas të shtënave. Bideni denoncoi dhunën derisa në një deklaratë më herët kishte deklaruar se ishte “mirënjohës” që Trumpi është i sigurt. Bideni, i cili planifikonte të qëndronte në Delaware për fundjavën, është kthyer në Shtëpinë e Bardhë më herët se sa ishte planifikuar, në mënyrë që të mund të vazhdonte të merrte informacione nga forcat e zbatimit të ligjit.
