Komuna e Prizrenit e udhëhequr nga Shaqir Totaj i PDK-së, gjatë vitit të kaluar nuk ka arritur t’i shpenzojë nga buxheti i saj gjithsej 8 milionë e 984 mijë e 5 qind e 79 euro e 71 centë, shkruan KosovaNews.
Lidhur me këtë ka reaguar gjatë seancës së Kuvendit Komunal, asamblistja e LVV-së Dafina Alishani, duke pyetur se si ndodhi që menaxheri i certifikuar për performancë Shaqir Totaj lë të pa shpenzuar këto mjete.
Ajo gjithashtu ka reaguar për mungesën e drejtorëve Komunalë në seancë për ta sqaruar mos shpenzimin e këtyre mjeteve.
“Po më vjen tepër keq se këtu ka njerëz që kanë reaguar e kanë lëshuar sallë kur nuk ka pasë drejtor këtu. E njëjta PDK, ka lëshuar sallë kur s’kanë qenë drejtorët këtu. Tash vetë këta po heshtin edhe kur po i shohin mungesën e drejtorëve të tyre”, ka theksuar Alishani.
Ajo, po ashtu ka kërkuar llogari nga kryetari Totaj i cili nuk ishte prezent në seancë, duke e fajësuar me ikje nga përgjegjësia.
“Kryetari i Komunës, na ka pasë lodhë me atë performancë, me ato certifikata na ka lodhë krejt fushatën. Qe tash po e shohim performancën tuaj. Ju midis pandemisë, keni dalë më media dhe keni kërkuar llogari për suficit. Tash po bejka me u arsyetu në inflacion. E ne kur jemi arsyetuar me pandemi, keni thënë s’na intereson neve se jeni të pa aftë me menaxhu. Vet Kryetari Totaj ka dal në konferenca për media midis pandemisë e ka kërku llogari prej kryetarit të kaluar. Tash me qetësi po doni me e kalu këtë.. 9 milionë euro nuk po di me i shpenzu menaxheri i njohur bashkë me ekzekutivin e tij edhe kurrgjë kërkujna”, u shpreh Alishani.
“A keni përgjegjësi ndaj qytetarëve, se me këto premtime ju keni aradhe këtu. Keni thënë që ju jeni më të mirë.”, ka thënë Alishani.
Lidhur me suficitin 9 milionësh kanë reaguar edhe nga LDK-ja, duke ia përkujtuar Totajt kohën e fushatës ku në një përballje televizive kishte thënë se “Çdo suficit buxhetor mbi 9%, është tregues i korrupsionit potencial”./KosovaNews/
