Anëtarët e NATO-s po takohen në Washington këtë javë për të shënuar 75-vjetorin e organizatës më të madhe të sigurisë në botë, ashtu si Rusia po vazhdon luftën e saj në fushën e betejës në Ukrainë.
Samiti treditor do të fokusohet në mënyrat për të siguruar Ukrainën për mbështetjen e qëndrueshme të NATO-s dhe për t’u ofruar disa shpresa qytetarëve të saj të lodhur nga lufta se vendi i tyre mund të mbijetojë konfliktin më të madh tokësor në Evropë në dekada.
Sekretari i Përgjithshëm i NATO-s, Jens Stoltenberg ka thënë në një konferencë për media se Ukraina përfundimisht do të bëhet anëtare e aleancës.
“Ne po shkojmë, së bashku me Ukrainën, gjithnjë e më afër anëtarësimit në NATO”, ka deklaruar Stoltenberg.
Samiti i NATO-s po zhvillohet në një sfond pasigurie. Ndarjet politike të SHBA-së vonuan armët për Ukrainën me muaj të tërë dhe zgjedhjet e ardhshme presidenciale po ngjallin shqetësim se mbështetja e SHBA – me armë dhe trupa, në rast kërcënimesh ndaj vendeve anëtare, mund të mos jetë gjithmonë e garantuar.
Stoltenberg ka thënë se anëtarësimi i Finlandës dhe Suedisë e ka bërë aleancën më të fortë. Sipas tij, aleanca ka parë një model të rritjes së akteve armiqësore ruse kundër aleatëve të NATO-s gjatë muajve të fundit.
“Ne jemi duke rritur ndërgjegjësimin. Ne po i bëjmë aleatët të vetëdijshëm për këtë”, është shprehur ai.
