Spanja e ka mbyllur fazën e grupeve në Kupën e Botës 2026 me fitore, pasi mposhti Uruguain me rezultat minimal 1-0 në Guadalajara, duke siguruar vendin e parë në Grupin H. Humbja rezultoi fatale për skuadrën e Marcelo Bielsës, e cila u eliminua nga turneu.
Golin e vetëm të ndeshjes e realizoi Alex Baena në minutën e 42-të, pasi përfitoi nga një rrëmujë në zonë dhe mposhti portierin Fernando Muslera.
Barazimi pa gola mes Kepit të Gjelbër dhe Arabisë Saudite në ndeshjen tjetër të grupit bëri që Uruguai të mbetej jashtë fazës së 1/16-ës.
Spanja dominoi pjesën e parë, duke krijuar disa raste të mira shënimi, ndërsa epërsinë e gjeti pak para pushimit.
Portieri uruguaian Fernando Muslera bëri një tjetër gabim vendimtar, duke u bërë portieri i parë që nga viti 1966 që shkakton tre gola me gabimet e tij në një edicion të vetëm të Kupës së Botës.
Në pjesën e dytë, Uruguai u hodh në sulm në kërkim të barazimit, por pavarësisht ndryshimeve sulmuese të trajnerit Marcelo Bielsa, nuk arriti të krijonte raste të pastra.
Rastin më të mirë për uruguaianët e pati Darwin Núñez, i cili doli përballë portës, por portieri Unai Simón ndërhyri në momentin vendimtar.
Në anën tjetër, Spanja ishte pranë golit të dytë në minutat e fundit, kur Ferran Torres goditi traversën.
Takimi u mbyll me tensione, pasi Nicolás de la Cruz u ndëshkua me karton të verdhë, ndërsa Agustín Canobbio humbi kontrollin, ndërhyri ashpër ndaj Pau Cubarsí dhe u përjashtua me karton të kuq direkt. Pas këtij momenti ai u përplas edhe me arbitrin Ismail Elfath, duke vulosur një mbrëmje zhgënjyese për Uruguain.
