Një incident i rëndë ka ndodhur sot pasdite brenda hapësirave të Stacionit Policor “Jugu” në Prishtinë, ku dyshohet se një zyrtar policor ka sulmuar fizikisht kolegun e tij gjatë orarit të punës.
Hetuesit e Inspektoratit Policor të Kosovës (IPK) janë njoftuar menjëherë pas incidentit dhe kanë ndërmarrë veprime hetimore në vendin e ngjarjes. Si rezultat, një zyrtar policor është arrestuar nën dyshimin për kryerjen e veprës penale “Sulm”.
Sipas njoftimit të IPK-së, arrestimi është bërë në përputhje me vendimin e prokurorit përgjegjës, i cili ka urdhëruar masën e ndalimit për 48 orë ndaj të dyshuarit.
Po ashtu, IPK ka rekomanduar suspendimin e zyrtarit policor të përfshirë, në përputhje me autorizimet ligjore dhe në interes të hetimit.
Hetuesit e IPK-së, në koordinim të vazhdueshëm me Prokurorinë, pritet të ndërmarrin veprime të tjera hetimore për të zbardhur tërësisht rrethanat e këtij rasti.
Inspektorati Policor i Kosovës thekson përkushtimin për të trajtuar me seriozitet çdo sjellje të kundërligjshme të zyrtarëve të rendit, në funksion të forcimit të integritetit dhe besueshmërisë së Policisë së Kosovës.
