Dhjetëra qytetarë u mblodhën sot para Teatrit Kombëtar të Kosovës në Prishtinë në shenjë proteste kundër dhunës ndaj grave dhe vajzave dhe pas rastit të dhunimit të 11-vjeçares nga pesë persona. Në këtë reagim qytetar nuk morën pjesë ndonjë prej figurave të njohura publike apo krerët e institucioneve shtetërore, ndonëse gjatë ditës së djeshme pati reagime të shumta.
Aktivistja Xheraldina Rexhepi, duke e quajtur ngjarjen e djeshme si makabre, u shpreh se këto ngjarje tregojnë se shoqëria ka dështuar.
Duke u shpreh e bindur se do të ketë reagim institucional ndaj personave të dyshuar ajo tha se nuk po bëhet asgjë në drejtim të parandalimit të këtyre dukurive.
“Unë kam qenë dje shumë i indinjuar sepse është një ngjarje makabre e cila nuk ka ndodhur rastësisht, është ngjarje në të cilën nuk ka dështuar askush në atë që ka ndodhur dje kemi dështuar të gjithë si shoqëri. Institucioni i parë shoqërisë sonë, familja, që se ka ditë ku e ka vajzën 7 orë, dhe familja e atyre djemve që ka rritur djem që iu është dukur në rregull që munden ta trajtojnë një fëmijë 11-vjeçare në atë mënyrë duke e lënë të lirë sepse nuk kanë qenë as të vetëdijshëm për krimin që ka bërë…. Ne si shoqëri nuk jemi duke bërë asgjë, nuk mundemi me prit prej shtetit për t’i kryer këto punë na secili prej vetes sonë duhet të fillojë ndryshimin në këtë shoqëri”, tha ajo.
Nga Ferizaj për të marrë pjesë në këtë protestë kishte ardhur edhe Shukri Retkoceri, i cili kërkoi nga krerët e shtetit që të reagojnë karshi dukurive të dhunimit.
Ai kërkoi hetim për prokurorët dhe gjyqtarët që merren me këto raste.
“Unë e lus Vjosa Osmanin, Albin Kurtin, Albulena Haxhiun le t’i hulumtojnë pak prokurorët dhe gjyqtarët apo e kryejnë punën apo e kryejnë detyrat sipas ligjit sipas Kushtetutës së Kosovës. Ky akt dje kriminal që ka ndodhur, ata dhunues e meritojnë varje këtu përpara bustit të Skënderbeut dhe më kurrë këso raste nuk ndodhin. Në Kosovë dhunimet po ndodhin me dhjetëra apo qindra herë për një motmot… O prokurorë, o gjyqtarë a keni bre ju çika, a keni motra, a keni mbesa po me iu ndodh kështu juve në familjet tuaja e lutja ime o prokurorë e gjyqtarë të Kosovës nëse nuk kryeni detyrat edhe punën se kryeni me ligj e me Kushtetutës zoti fytyrën ua marroftë”, u shpreh ky qytetar.
Lulzim Bexheti kërkoi nga qeveria që përmes edukimit të hershëm të parandalohen këto raste.
Ai iu bashkua kauzë që emrat e personave që tashmë dyshohen për dhunim të 11-vjeçares të bëhen publik.
“Jemi këtu prezent me shfaq një simpati ndaj vajzës së vogël që i ka ndodh rasti njëkohësisht të dënoj këtë si akt sepse qoftë i fundit ky akti. E shohim se jemi pak veta këtu por ata që jemi, jemi me zemër dhe me shpirt i shprehim së pari qëndrim dinjitet për familjen e vajzës, ndërsa për qeverinë kam dy fjalë, duhet shumë me punua nuk është vetëm arsimi që i ndalon këto gjëra, por është edukimi i hershëm edhe duhet me u shfaq në masë të madhe me emër me mbiemër konkret, është mjaftë këto me u fsheh”, theksoi ai.
Edhe ditën e nesërme me fillim nga ora 12:00 është paralajmëruar protestë për të kundërshtuar dhunën ndaj grave.
Dhunimi i të miturës ngjalli reagim të madh në shoqërinë tonë. Aktualisht deri tani janë arrestuar katër persona, kurse personi i pestë është në kërkim.
