Zyra e Prokurorit të Specializuar (ZPS) me seli në Hagë në gjykimin për krime lufte ndaj Pjetër Shalës, do të thërrasë 19 dëshmitarë.
Kështu është bërë e ditur në një njoftim të Dhomave të Specializuara lidhur me vendimin mbi kryerjen e procedurave në rastin e Shalës.
“Trupi gjykues I, në vendimin e tij mbi kryerjen e procedurave në gjykimin ndaj Shalës, ndër të tjera, i ka caktuar ZPS-së 53,5 orë për të paraqitur provat e saj. ZPS-ja do të thërrasë 19 dëshmitarë. Mbrojtjes dhe ZPS-së do t’u caktohet përqindja e njëjtë e kohës për të marrë në pyetje një dëshmitar të ZPS-së”, thuhet në njoftim.
Tutje, është bërë e ditur se mbrojtësit të viktimave do t’i caktohet 25 për qind e kohës faktike të përdorur nga ZPS-ja.
Gjithashtu, thuhet se Trupi Gjykues caktoi seancat shtesë më 19 maj dhe më 16 qershor dhe e anuloi seancën e 30 qershorit
Ndryshe, Shala u arrestua më 16 mars 2021, nga autoritetet belge dhe u transferua në Hagë më 15 prill 2021, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës.
Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.
“Krimet për të cilat akuzohet z. Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”, thuhet në komunikatë.
