Njësi të Specializuara të Policisë së Kosovës nga orët e mëngjesit të sotëm janë duke kryer një operacion të gjerë të kontrolleve në disa prej lagjeve luksoze të kryeqytetit. Prezenca e Specialëve edhe sot në këto lokacione është pjesë e operacionit Brezovica.
Nga raportimet e deritashme të arrestuar janë disa zyrtarë të ministrisë, një zyrtar i KEDS-it, biznesmenë dhe një asamblist i Kuvendit komunal të Prishtinës nga radhët e Vetëvendosjes.
Prokuroria Themelore në Ferizaj, ka njoftuar se shtatë personat të cilët u arrestuan mëngjesin e së mërkurës në aksionin “Brezovica 6”, dyshohen për veprat penale “Marrja e ryshfetit”, “Dhënia e ryshfetit”, “Fajdeja” si dhe “Ushtrimi i ndikimit”.
Në njoftim bëhet e ditur se të arrestuarit me vendim të Prokurorit të Shtetit, janë ndaluar për 48 orë.
Në këtë aksion i cili është vazhdimësi i rasteve të mëhershme, bëhet e ditur se janë kontrolluar dhe bastisur 11 lokacione të ndryshme, konkretisht tetë lokacione në qytetin e Prishtinës, dy në Podujevë dhe një në Fushë Kosovë.
“Prokuroria Themelore në Ferizaj, njofton opinionin publik se në bashkëpunim me Policinë e Kosovës, Drejtoria për Hetimin e Krimeve të Rënda (DHKR) në Prishtinë, në bazë të urdhëresës së lëshuar nga Gjykata Themelore në Ferizaj për kontrollin e shtëpive dhe objekteve përcjellës, sot ka realizuar aksionin “Brezovica” i cili është vazhdimësi i rasteve të mëhershme, ku, me ç’rast gjatë këtij aksioni, janë kontrolluar dhe bastisur njëmbëdhjetë (11) lokacione të ndryshme, konkretisht tetë (8) lokacione në qytetin e Prishtinës, dy (2) në Podujevë dhe një (1) në Fushë Kosovë, ku me ç’rast, janë arrestuar shtatë (7) persona të dyshuar dhe të njëjtit me vendim të Prokurorit të Shtetit, janë ndaluar në kohëzgjatje prej 48 orësh, për shkak të dyshimit se të njëjtit kanë kryer veprat penale “Marrja e ryshfetit”, nga neni 421 i Kodit Penal të Republikës së Kosovës “Dhënia e ryshfetit”, nga neni 422 , “Fajdeja” nga neni 331 dhe “Ushtrimi i ndikimit” nga neni 424 të Kodit Penal të Republikës së Kosovës”, thuhet në komunikatën për media.
Nga aksioni “Brezovica 6”, të mërkurën janë vënë në pranga edhe disa zyrtarë të shtetit, si S.S. dhe G.B, të cilët siç raporton KOHA janë nga Ministria e Mjedisit.
Prokurori i çështjes, Rasim Maloku, ka konfirmuar se tre zyrtarë të MMPHI-së janë arrestuar. Ai ka bërë të ditur se është arrestuar edhe një zyrtar i KEDS-it dhe tre biznesmenë.
Prokurori Maloku, ka konfirmuar edhe arrestimin e asamblistit të Lëvizjes Vetëvendosje në Komunën e Prishtinës, Berat Lahu.
Prokurori tha se Lahu dyshohet për veprën penale “Ushtrim i ndikimit”.
Rasti Brezovica deri më tani ka dërguar në burg mbi 30 persona përfshirë zyrtarë të lartë shtetërorë përgjegjës për ndërtimin e mbi 500 vilave dhe hoteleve në zonën e mbrojtura të maleve të Sharrit.
Dosja ngritë dyshime për një aferë ku besohet të jenë kërkuar mbi 20 milionë euro mitos nga zyrtarë e kompani të ndryshme të ndërtimit.
Deri më tani prokuroria ka bllokuar prona në vlerë mbi 5 milionë euro të cilat po mbahen të sekuestruara për llogari të këtij hetimi.
