Zëdhënësi i Policisë së Kosovës, Baki Kelani ka paralajmëruar se policia mund të hapë së shpejti një konkurs.
Kelani në një konferencë për media ka thënë se konkursi i ardhshëm mund të jetë për shkak të nevojës për kandidatë nga komunitetet që vjen si pasojë e dorëheqjeve të policëve në Mitrovicën Veriore.
“Për shkak të dorëheqjeve të policëve në Mitrovicën Veriore ka qenë edhe konkursi i fundit, ka nevojë të ketë ende kandidatë nga komunitetet dhe konkursi i ardhshëm mund të jetë për atë arsye. Ka nevojë të ketë ende kadetë të komuniteteve të tjera, mund të jetë edhe konkurs që do t’i dedikohet kryesisht minoriteteve, por nuk përjashtohen edhe konkurset e tjera të radhës që do ti dedikohen edhe shqiptarëve. Për këtë do të jeni të njoftuar me kohë, se kur dhe për çfarë nevoja do të hapet konkursi i radhës”, ka thënë Kelani.
Ndryshe, Kelani së bashku me Jeton Rexhepin, drejtor i Divizionit të Komunikacionit Rrugor kanë mbajtur një konferencë për media ku kanë bërë të ditur se në periudhën janar – mars të vitit 2022 janë shënuar 4528 aksidente kurse në periudhën e njëjtë të vitit 2023, ka pasur 4248 aksidente në total.
