Ministria e Mbrojtjes e Republikës së Kosovës dhe Ministria e Mbrojtjes e Malit të Zi kanë nënshkruar sot në Prishtinë një marrëveshje bashkëpunimi në fushën e mbrojtjes.
Kështu bëri të ditur në një konferencë për media ministri i Mbrojtjes i Republikës së Kosovës, Armend Mehaj pas takimit me homologun malazez, Rasko Konjeviç.
“Paqja, siguria dhe stabiliteti rajonal janë jetike për shtetet e Ballkanit. Kjo është e ardhmja jonë, e ardhmja euro-atlantike”, tha ministri.
Mehaj bëri të ditur se me ministrin malazez kanë nënshkruar një marrëveshje bashkëpunimi që prekë shumë fusha.
“Nëpërmjet kësaj marrëveshje ne zgjerojmë bashkëpunimin në fushën e mbrojtjes që është i domosdoshëm në asketin e sigurisë, stabilitetit dhe demokracisë në mes dy vendeve dhe në të mirë të rajonit.
Bashkëpunimi ynë do të shtrihet në shkëmbimin e përvojave profesionale e deri te angazhimi në mbështetje reciproke me kapacitete operacionale në raste të emergjencave”, tha ministri Mehaj.
Pas nënshkrimit të memorandumit të bashkëpunimit, të dy ministrat do të adresohen me deklaratë për media.
