Ish- udhëheqësit e Ushtrisë i Çlirimtare të Kosovës, Hashim Thaçi, Rexhep Selimi, Kadri Veseli dhe Jakup Kransiqi janë deklaruar sërish para trupit gjykues se janë plotësisht të pafajshëm.
Ata me radhë e kanë konfirmuar deklarimin e tyre të parë se janë të pafajshëm pasi Gjykata i pyeti për t’u deklaruar prap për fajësi ose pafajësinë.
I pari ishte Hashim Thaçi që deklaroi para trupit gjykues se është plotësisht i pafajshëm.
Ndërsa Jakup Krasniqi, tha se është i pafajshëm dhe s’ka asnjë lidhje me akuzat që u lexuan.
“S’kam asnjë lidhje me pikat që i lexoi prokuroria para pak kohësh. Akuzën e kuptoj, por nuk pajtoj pasi nuk mbaj asnjë përgjegjësi me atë që e flet akuza. Jam plotësisht i pafajshëm”, tha ai.
“Po gjithsesi, e shprehi pakënaqësinë time për një vonesë të tillë 2 vjeçare e gjysmë, megjithatë ju falënderoj, jam tërësisht i pafajshëm”, tha Veseli.
“Jam i pafajshëm për të gjitha pikat në aktakuzë”, deklaroi Selimi.
Ndërsa, Zyra e Prokurorisë Speciale i numëroi pikat e akuzës.
“Të akuzuari me anë të pjesëmarrjes së përbashkët, kryen, ndihmuan dhe inkurajuan. Dinin ose kishin arsye të dinin se krimet e kryera ishin në prag të kryerjes ose ishin kryer nga vartësit dhe nuk morën masat për parandalimi ne atyre dhe për ndëshkimin e kryerësve të tyre. Ata kanë përgjegjësi penale për: ndjekje, krim kundër njerëzimit, burgosje, arrestim, akte të tjera çnjerëzore, krim kundër njerëzimit i ndëshkuar, trajtim mizor, krim lufte, torturë, krim kundër njerëzimit, torturë, vrasje e paligjshme”, tha.
Sot ka filluar edhe zyrtarisht seanca gjyqësore ndaj Hashim Thaçit, Kadri Veselit, Jakup Krasniqit e Rexhep Selimit në Dhomat e Specializuara të Kosovës në Hagë.
Për të parë gjykimin klikoni në linkun më poshtë
https://streaming.scp-ks.org/sq/index.html
