Për shkak të numrit të pakët të deputetëve të pranishëm në sallë, është shtyrë rezoluta për shkarkimin e ministres së Industrisë, Ndërmarrësisë dhe Tregtistë, Rozeta Hajdari.
Ishin vetëm 50 deputetë prezentë, gjë që pamundësoi vijimin e aktiviteteve në Parlamentin e Kosovës.
Pas debatit për gjendjen në këtë ministri, në sallën e Kuvendit të Kosovës ishin vetëm 50 deputetë, prandaj kryetari Glauk Konjufca e mbylli seancën.
“50 deputetë janë në seancë duke marrë pjesë, kështu që shihemi ndonjë ditë tjetër kur t’iu lajmëroi”, tha Konjufca.
Kjo pikë e rendit të ditës, “Shqyrtimi i Propozim-rezolutës për gjendjen në Ministrinë e Industrisë, Ndërmarrësisë dhe Tregtisë, ishte shtyrë edhe dje për sot”.
Partia Demokratike e Kosovës e ka propozuar rezolutën për shkarkimin e Hajdarit për mosdeklarim të pasurisë.
