Prishtinë – Në Gjykatën Themelore të Prishtinë, të hënën ka dështuar të mbahet gjykimi ndaj ish-ministres të Integrimeve Evropiane Dhurata Hoxha, e cila së bashku me Ekrem Tahiri, Fitim Mustafës dhe Gëzim Dushin po akuzohen për keqpërdorim të detyrës zyrtare.
Seanca ka dështuar për shkak të mungesës së mbrojtëses të të akuzuarit Dushi, avokates Kosovare Kelmendi, raporton “Betimi për Drejtësi”.
Lidhur me mungesë e avokates Kelemendi, kryetari i trupit gjykues, gjyqtari Vesel Ismajli bëri të ditur se e njëjta e kishte njoftuar përmes e-mailit se nuk mund të ishte prezentë në seancën e sotme për shkak se ishte e angazhuar në një rast tjetër dhe nuk kishte mundur të siguronte një zëvendësim.
Gjithashtu, edhe seanca e paraparë të mbahet më 10 shtator 2024 është anuluar për të njëjtën arsye.
Andaj, në mungesë të kushteve ligjore, seanca e paraparë të mbahej sot është shtyrë për një datë tjetër.
Ndryshe, ish-ministrja Dhurata Hoxha akuzohet se kishte përdorë kontratën e MIE-së për të promovuar fushatën në zgjedhjet parlamentare të vitit 2019, përderisa kjo kontratë shërbente për të informuar qytetarët rreth procesit të liberalizimit të vizave.
Prokuroria Speciale e Republikës së Kosovës më 12 maj 2022, kishte ngritur aktakuzën ndaj Hoxhës dhe tre të tjerëve Ekrem Tahiri, Fitim Mustafa dhe Gëzim Dushi, duke i ngarkuar me veprën penale “Keqpërdorimit të pozitës apo autoritetit zyrtar”. /BetimipërDrejtësi
