Kompania ajrore skandinave SAS ka njoftuar se do të anulojë të paktën 1,000 fluturime në muajin prill, pas rritjes së çmimeve të karburantit për aeroplanë si pasojë e konfliktit të fundit në Lindjen e Mesme.
Kjo kompani ka paralajmëruar shumë anulime pas Pashkëve, raportoi “Euronews”.
Çmimi i karburantit për aeroplanë është dyfishuar brenda dhjetë ditëve. Edhe pse përpiqemi të përballojmë sa më shumë rritjen e kostove, kjo është goditje e drejtpërdrejtë për industrinë e aviacionit”, ka thënë drejtori ekzekutiv i SAS-it, Anko van der Werff, për gazetën suedeze “Dagens Industri”.
SAS-i ishte një nga kompanitë e para që rritën çmimet e biletave për të kompensuar rritjen e shpejtë të karburantit.
Deri tani, disa qindra fluturime janë anuluar gjatë marsit, kryesisht në linjat brenda Norvegjisë, ndërsa vetëm pak kanë ndikuar në Suedi dhe Danimarkë.
Rritja e çmimeve të karburantit lidhet me tensionet në Lindjen e Mesme, ku sulmet e SHBA-së dhe Izraelit ndaj Iranit dhe hakmarrja iraniane ndaj instalimeve të naftës në disa shtete të Gjirit kanë rritur ndjeshëm çmimin e naftës. Gjithashtu, Ngushtica e Hormuzit, përmes së cilës kalon një e pesta e kërkesës globale për karburante, është praktikisht e mbyllur.
Shumë linja ajrore, përfshirë Air France-KLM Cathay Pacific, Air India dhe Qantas, kanë rritur çmimet e biletave dhe disa kanë ndaluar fluturimet drejt Lindjes së Mesme për arsye sigurie
