Rritet numri i të infektuarve me Ebola në Republikën Demokratike të Kongos. Agjencia Kryesore Shëndetësore e Afrikës raportoi se 80 persona kanë humbur jetën deri më tani, ndërsa raportohet për 246 raste të prekura nga virusi.
Zonat më të prekura janë kryesisht zonat minerare të arit Mongwalu dhe Rwampara. Autoritetet shëndetësore theksojnë se situata është veçanërisht shqetësuese për shkak të lëvizjeve të shumta të popullsisë në këto zona dhe aktivitetit të gjerë minerar.
Në Uganda është konfirmuar gjithashtu një rast i importuar i Ebolës. Ministria e Shëndetësisë njoftoi se një burrë 59-vjeçar nga Kongo, i cili kishte vdekur në spital, rezultoi pozitiv me virusin.Ebola është një sëmundje virale e identifikuar për herë të parë në vitin 1976 në atë që sot është Republika Demokratike e Kongos. Sëmundja dyshohet se ka origjinën nga lakuriqët e natës dhe përhapet përmes kontaktit të drejtpërdrejtë me lëngjet trupore ose përmes lëkurës së dëmtuar.
Simptomat fillestare përfshijnë ethe, dhimbje muskujsh, lodhje, dhimbje koke dhe dhimbje fyti, ndërsa më pas mund të shfaqen të vjella, diarre, skuqje të lëkurës dhe hemorragji të brendshme ose të jashtme. Sipas Organizatës Botërore të Shëndetësisë, shkalla mesatare e vdekshmërisë nga virusi është rreth 50%.
Testet paraprake të kryera në Institutin Kombëtar të Kërkimeve Biomjekësore në kryeqytetin Kinshasa kanë konfirmuar praninë e virusit në 13 nga 20 mostra të analizuara. Aktualisht po përcaktohet edhe lloji i saktë i virusit.
Nga 80 viktimat e raportuara, katër janë raste të konfirmuara laboratorikisht, ndërsa raste të tjera të dyshuara janë raportuar edhe në qytetin Bunia, ku ende priten rezultatet laboratorike. Qendra për Parandalimin e Sëmundjeve në Afrikë ka paralajmëruar për rrezik të lartë për përhapje të mëtejshme të sëmundjes, duke theksuar se koordinimi rajonal mes Kongos, Ugandës dhe vendeve fqinje, përfshirë Sudanin e Jugut, është thelbësor për kontrollin e situatës.
raporton ; https://abcnews.al/
