Shërbimi Spitalor Klinik dhe Universitar i Kosovës ka njoftuar të enjten se shërbimi i Radioterapisë në Klinikën e Onkologjisë është plotësisht funksional.
Sipas njoftimit të SHSKUK-së, shërbimit me Radioterapi i nënshtrohen më shumë se 90 pacientë, kurse pacientët që janë në pritje, trajtohen sipas listës së planifikuar nga mjekët onkologë.
“Në bazë të raportit të sotëm, Klinika e Onkologjisë ka një furnizim stabil me barna e citostatikë dhe përmbush 80% të kërkesave, derisa po punohet me angazhim të plotë që të sigurohet edhe pjesa tjetër”, thuhet në njoftim.
Menaxhmenti i SHSKUK-së, sipas njoftimit, është duke punuar intensivisht për të hartuar protokollet unike, në bazë të të cilave do të bëhet trajtimi.
“Përshkrimi i terapisë, ndërkaq, do të bëhet vetëm përmes konsiliumeve mjekësore, që janë kompetente për përshkrim të terapisë onkologjike”, vijon njoftimi.
