Policia e Shqipërisë do të nisë prej sot zbatimin e masave të sigurisë, në kuadër të Samtit të BE-Ballkani Perëndimor, që do të mbahet në Tiranë më 6 dhjetor.
Sipas autoriteteve, Policia do të bëjë bllokimin e akseve rrugore që nga e hëna në orën 14:00, deri në largimin e personaliteteve pjesëmarrëse në Samit.
Brenda perimetrit të sigurisë do të lejohet vetëm lëvizja e qytetarëve. Ky zbatim i masave, siç njoftojnë autoritetet, bëhet në bashkëpunim me agjencitë e zbatimit të ligjit, ekspertët e vendeve të BE-së dhe me INTERPOL-in e EUROPOL-in.
Të martën më datën 6 dhjetor pritet të zhvillohet samiti i Bashkimit Evropian me Ballkanin Perëndimor në Tiranë.
Përveç liderëve të vendeve të Ballkanit Perëndimor, liderët e BE-së që pritet të vijnë në samit janë Presidentja e Komisionit Evropian Ursula Von Der Leyen, Presidenti i Këshillit Evropian Charles Michel, Shefi i diplomacisë së Bashkimit Evropian, Josep Borrell, Presidenti i Francës, Emmanuel Macron, Kancelari i Gjermanisë, Olaf Scholz, Kryeministri i Greqisë, Kyriakos Mitsotakis, Kryeministri i Hungarisë Viktor Orban, Kryeministrja e Italisë, Giorgia Meloni, Kancerlari i Austrisë, Karl Nehammer, Kryeministri i Belgjikës, Aleksandër De Croo.
Në samit pritet gjithashtu Presidenti i Bullgarisë, Rumen Radev, Kryeministri i Kroacisë, Andrej Plenkoviç, Presidenti i Qipros, Nicos Anastasiades, Kryeministri i Çekisë, Petr Fiala, Kryeministrja e Danimarkës, Mette Frederiksen, Kryeministrja e Estonisë, Kaja Kallas, Kryeministrja e Finlandës Sanna Marin, Kryeministri i Irlandës, Micheal Martin.
