Shqipëria hap 4 kapituj të rinj në negociatat me BE më 16 shtator
Shqipëria do të hapë më 16 shtator katër kapituj të tjerë të negociatave për anëtarësim në Bashkimin Evropian, në kuadër të Konferencës së 6-të Ndërqeveritare me BE, të ftuar nga Presidenca daneze.
Kryeministri Edi Rama njoftoi lajmin në rrjetet sociale, duke theksuar: “Të martën, datë 16 shtator, Presidenca Daneze e BE-se na fton që në praninë e Ministrave të Jashtëm të të gjitha vendeve anëtare, të hapim edhe 4 kapituj të tjerë të negociatave për anëtarësim. Shqipëria nuk ndalet.”
Këto kapituj përfshijnë grupin 4 “Axhenda e gjelbër dhe lidhshmëria e qëndrueshme”, duke përfshirë:
- Kapitullin 14 – Politika e transportit
- Kapitullin 15 – Energjia
- Kapitullin 21 – Rrjetet trans-evropiane
- Kapitullin 27 – Mjedisi dhe ndryshimet klimatike
Postimi i plote
“TJETËR LAJM I MIRË – Shqiperia nuk ndalet
Të martën, datë 16 shtator, Presidenca Daneze e BE-së na fton që në praninë e Ministrave të Jashtëm të të gjitha vendeve anëtare, të hapim edhe 4 kapituj të tjerë të negociatave për anëtarësim, të cilët u shtohen 24 kapitujve që kemi hapur në vetëm 11 muaj – një rekord absolut për shpejtësinë e një procesi negociatash.
Agjenda e Gjelbër dhe Ndërlidhja e Qendrueshme, mbi fusha të rëndësisë jetike, si Transporti, Energjia, Rrjetet Transeuropiane dhe Mjedisi, janë tanimë në tryezë. U vendos edhe tjetër gur kilometrik në rrugën drejt majës së Shqipërisë 2030 në BE”
