Volodymyr Zelensky po udhëton sot në Arabinë Saudite për të takuar Princin e Kurorës Mohammed bin Salman.
Bisedimet do të zhvillohen midis ekipit të presidentit ukrainas dhe zyrtarëve amerikanë për përfundimin e luftës me Rusinë në një moment gjithnjë e më të pasigurt për Kievin.
Bëhet e ditur se dikur aleati kryesor i Ukrainës, nën administratën e dytë të Donald Trump, SHBA ka riorientuar politikën e saj të jashtme dhe mbështetjen për vendin.
Ndërsa udhëheqësi i Arabisë Saudite ka luajtur role të ndryshme ndërmjetësuese që nga fillimi i luftës në 2022, duke përfshirë ndërmjetësimin e shkëmbimeve të të burgosurve dhe pritjen e bisedimeve midis Rusisë dhe SHBA-së muajin e kaluar.
Bisedimet do të zhvillohen të martën dhe do të jenë të parat midis dy vendeve që nga mosmarrëveshja e Zyrës Ovale midis Zelenskyt dhe Trump.
Raportohet se fokusi pritet të jetë te marrëveshja e mineraleve kritike, si dhe mënyra për t’i dhënë fund luftës, shkruan skynews, përcjell KosovaNews.
Ndryshe, Zelensky ka konfirmuar se nuk do të marrë pjesë në bisedimet e paqes, dhe në vend të kësaj delegacioni ukrainas do të përfshijë shefin e tij të shtabit, ministrat e jashtëm dhe të mbrojtjes dhe një zyrtar të lartë ushtarak në administratën presidenciale.
“Nga ana jonë, ne jemi plotësisht të përkushtuar ndaj dialogut konstruktiv dhe shpresojmë të diskutojmë dhe të biem dakord për vendimet dhe hapat e nevojshëm”, tha Zelensky.
“Propozimet realiste janë në tryezë. Çelësi është të lëvizësh shpejt dhe me efektivitet”, shtoi ai.
I dërguari i posaçëm i SHBA-së, Steve Witkoff, i cili ka organizuar bisedimet, ka thënë se ideja këtë javë ishte “të hidhej një kornizë për një marrëveshje paqeje dhe gjithashtu një armëpushim fillestar”.
Zelensky më parë ofroi disa detaje se si mund të duken fazat e para të paqes, duke bërë thirrje për një armëpushim në ajër dhe në det, si dhe një shkëmbim të të burgosurve.
Rusia, megjithatë, ka hedhur poshtë idenë e një armëpushimi të përkohshëm, duke pretenduar se kjo është një ofertë për Kievin për të blerë kohë.
Gjithashtu, Zelensky ka thënë se është gati të nënshkruajë marrëveshjen e mineraleve me SHBA-në.
